НЕСВИЖ - ТАЙНА ИСТОРИИ.

Цікавае мерапрыемства прайшло нядаўна ў Нясвіжскім раённым дзяржаўным агульнаадукацыйным ліцэі ў рамках акцыі "Жыву ў Беларусі і тым ганаруся", наладзіць якое дапамагла былая выпускніца, а зараз студэнтка 1 курса факультэта славянскай філалогіі БДУ Лізавета Пуляк. Лізавета вывучае славацкую мову. У БДУ яна пазнаёмілася са славацкімі і польскімі студэнтамі, якія праходзяць у нашай краіне стажыроўку, і запрасіла іх наведаць Нясвіж. Вечар знаёмства прайшоў у актавай зале ліцэя. На пачатку сустрэчы намеснік дырэктара па выхаваўчай рабоце В.І. Пуляк пазнаёміла гасцей з тымі мерапрыемствамі, якія праводзяць вучні. Потым ліцэісты паказалі спецыяльна падрыхтаваную прэзентацыю аб Славакіі. Затым мелі слова самі госці, якія дапоўнілі атрыманую раней інфармацыю аб сваёй краіне, расказалі аб тым, як у іх жывуць студэнты і вучні. Шмат цёплых слоў прагучала і ў адрас беларусаў і Беларусі.

- Я шчаслівы, што наведаў ужо ў другі раз ваш горад, - падкрэсліў студэнт філалагічнага факультэта Варшаўскага ўніверсітэта Ігар Сакалоўскі. - Нясвіж мне вельмі падабаецца. У вас захавалася шмат архітэктурных помнікаў, якія маюць важнае значэнне і для палякаў. Гісторыя ў нашых народаў цесна звязана. І Беларусь я наведваю ўжо не ўпершыню. Скажу шчыра, што пасля маёй роднай Польшчы гэта другая краіна, якую мне хочацца наведваць яшчэ і яшчэ.