На святочнай сцэне - "Горка маладым!" |
У мінулую сераду Рэспубліка Беларусь святкавала Дзень Незалежнасці і 69-ю гадавіну з дня вызвалення ад фашысцкіх захопнікаў у Вялікай Айчыннай вайне, а наш славуты горад адзначаў юбілей - 790-ю гадавіну свайго існавання на карце свету. Вашай увазе - працяг фотарэпартажу аб святочных мерапрыемствах.
Парадавала гледачоў сваім выступленнем на раённым фестывалі сямейнай творчасці "Таленты маёй сям'і" сям'я Качагаравых з Лявонавіцкага Сельскага савета, узнагароджаная дыпломам за ўдзел
На святочнай сцэне - "Горка маладым!" 3 ліпеня 25-гадовы юбілей сумеснага жыцця святкавала сям'я Ірыны і Андрэя Ванагель. Андрэй Міхайлавіч працуе ў Нясвіжскім упраўленні магістральных газаправодаў ААТ "Газпрам трансгаз Беларусь", актыўна ўдзельнічае ў спартыўных спаборніцтвах, Ірына Мікалаеўна працуе ў таварыстве з абмежаванай адказнасцю "Фармлэнд", удзельніца танцавальнага калектыву РЦКіА. Выхавалі сына Віталія. Сям'я вельмі дружная, любяць адпачываць на прыродзе, разам ходзяць у паходы на байдарках, заўсёды цікавяцца культурным жыццём горада і актыўна ў ім удзельнічаюць. У гонар сярэбранага вяселля юбіляры таксама атрымалі падарунак ад старшыні райвыканкама і апладысменты ад жыхароў горада
Моладзь з цікавасцю назірала за тым, як у "Горадзе майстроў" стварае непаўторныя паясы ручной работы загадчыца Лысіцкага сельскага клуба Алена Мокат
Нароўні з дарослымі захаплялі гледачоў сваімі выступленнямі маленькія артысты ў канцэртнай праграме "Юныя несвіжане - любімаму гораду"
Вельмі даспадобы самым юным удзельнікам свята была дзіцячая гульнёвая праграма каля фантана
Пераможца конкурснай праграмы для дзяўчынак "Міс Малютка" Дар'я Жук
Баі рыцараў і амазонак, па-акцёрску ўвасобленыя ўдзельнікамі клуба гістарычнай рэканструкцыі з г. Баранавічы "Баявая спадчына", вярнулі гледачоў у мінулыя стагоддзі
Ураджэнка Нясвіжа, а зараз жыхарка Варшавы Вераніка Даўнаровіч, выказвае шчырую ўдзячнасць старшыні Нясвіжскага райвыканкама Івану Крупко за падтрымку ў выданні кнігі "Гэта наша з табой біяграфія" і клопат улады аб гістарычнай спадчыне Нясвіжа
Намеснік начальніка аддзела культуры, ідэалагічнай работы і па справах моладзі Міхаіл Мацэль уручае кнігу "Гэта наша з табой біяграфія", падрыхтаваную да юбілею горада, заслужаным людзям раёна. За актыўную арганізацыйную работу па выданні кнігі Міхаіл Міхайлавіч быў узнагароджаны Ганаровай граматай райвыканкама. На здымку: кнігу атрымлівае несвіжанін Анатоль Жалняркевіч, успаміны якога ўвайшлі ў зборнік
На ўрачыстай прэзентацыі кнігі "Гэта наша з табой біяграфія" быў узнагароджаны дыпломам 1-й ступені пераможца раённага краязнаўчага конкурсу "Невядомы Нясвіж" супрацоўнік НГКМЗ "Нясвіж" Віталь Быль за эсэ "Нясвіжскі рубеж Слуцкага паўстання". Дыпломамі 2-й і 3-й ступені былі адзначаны яго калегі Аляксандр Лапо і Сяргей Егарэйчанка. У гэты ж дзень была адзначана памятнымі падарункамі каманда СШ№ 4 г. Нясвіжа, якая перамагла ў гарадскім брэйн-рынгу "Я ведаю пра Нясвіж усё"
Падзякі старшыні райвыканкама за актыўны ўдзел у стварэнні кнігі "Гэта наша з табой біяграфія" атрымалі аператар вёрсткі Нясвіжскай друкарні імя Сымона Буднага Зоя Клішэвіч (на фота) і намеснік галоўнага рэдактара газеты «Нясвіжскія навіны» Соф'я Любанец
На прэзентацыю кнігі "Гэта наша з табой біяграфія", былі запрошаны цяперашнія жыхары Нясвіжчыны і тыя, каго лёс закінуў далёка ад родных мясцін. На здымку на першым плане - сябар суполкі "Несвіжане ў Варшаве" Вацлаў Вяржбіцкі, удзельнік бітвы пад Монтэ-Касіна
Кніга "Гэта наша з табой біяграфія" стала найлепшым падарункам для ўсіх, яе аўтараў. Сваімі ўспамінамі падзялілася з чытачамі і былы начальнік аддзела культуры райвыканкама Леаніда Віхрова.
Соф'я ЛЮБАНЕЦ
Святлана ПОЛЬСКАЯ