Штотыдневiк «Голас Радзімы», №.39 (3111), чацвер, 23 кастрычнiка, 2008

У Нясвіжскую экспазіцыю з Польшчы перададзены каштоўныя радзівілаўскія рэчы. Цырымонія перадачы каштоўных рэчаў адбылася падчас сустрэчы Пасла Беларусі ў Польшчы Паўла Латушкі з прадстаўнікамі роду Радзівілаў — Мацеем і Каралем Радзівіламі. Гэта найперш дзве арыгінальныя прыжыццёвыя гравюры (XV і XVI стагоддзе) партрэтаў Януша Радзівіла і Мікалая Радзівіла, якія былі набыты на аўкцыёнах у Германіі. Перададзены таксама лічбавыя копіі партрэта Барбары Радзівіл і ўдакладненага генеалагічнага дрэва роду Радзівілаў. Перадаючы гэтыя каштоўныя рэчы, нашчадкі Радзівілаў выказалі жаданне ўбачыць іх у адноўленым Радзілаўскім замку ў Нясвіжы. Яны таксама выказалі гатоўнасць аказаць дапамогу ў вырабе якасных копій партрэтаў Радзівілаў, якія знаходзяцца ў музеях Варшавы. Паслом Беларусі ў Польшчы была выказана шчырая ўдзячнасць Мацею і Каралю Радзівілам за каштоўныя дакументы, якія зоймуць пачэснае месца ў музейнай экспазіцыі, што ствараеццца ў Ра-дзівілаўскім замку ў Нясвіжы. Варта зазначыць, што беларускае пасольства падтрымлівае шматгадовыя кантакты з прадстаўнікамі роду Радзівілаў у Польшчы. У прыватнасці, дыпмісіяй была арганізавана паездка Мацея і Караля Радзівілаў у Рэспубліку Беларусь. Да таго ж, Мацей Радзівіл падтрымлівае дзелавыя кантакты з Беларуссю. Так, яго фірмай падпісаны доўгатэрміновы кантракт на пастаўкі шчэбеню з Брэсцкай вобласці для рэканструкцыі чыгуначнай лініі Цярэспаль — Бяла-Падляска. Дарэчы, пры садзейнічанні пасольства на пачатку кастрычніка ў Нясвіжы прайшло пасяджэнне групы беларускіх і польскіх экспертаў з удзелам прадстаўнікоў міністэрстваў культуры Беларусі і Польшчы, а таксама прафесара з Лондана Анджэя Цеханавецкага. Сустрэча экспертаў праводзілася ў адпаведнасці з рашэннем Беларуска-Польскай кансультатыўнай камісіі па справах гісторыка-культурнай спадчыны, пасяджэнне якой адбылося ў красавіку 2008 года ў Познані. Мінкультуры Польшчы афіцыйна паінфармавала беларускае Пасольства, што ў адпаведнасці са зваротамі дыпмісіі, цяпер вядзецца работа па падрыхтоўцы лічбавых копій 48 партрэтаў Радзівілаў, якія знаходзяцца ў фондах музеяў у Варшаве, з далейшай перадачай іх у Нясвіжскую экспазіцыю. Таксама пасольства сумесна з Міністэрствам культуры Польшчы мае намер арганізаваць у бліжэйшы час стажыроўку беларускіх спецыялістаў, якія займаюцца стварэннем музейнай экспазіцыі ў Нацыянальным гісторыка-культурным запаведніку “Нясвіж”. Яна пройдзе на базе Каралеўскага замку, Нацыянальнага музея і Вілянаўскага палацава-замкавага комплексу ў Варшаве.